खरं सांगायचं तर आपण सर्व मला आधीपासूनच ओळखता, त्यामुळे हा परिचय ही फक्त एक औपचारिकता आहे. माझ्या जीवनाची सुरुवात, घडणं आणि आजवरचं कार्य हे सर्व आपल्या सहवासातच झालं आहे.

माझा जन्म, शिक्षण आणि आयुष्याची सुरुवात नागपूरचाळ,पुणे या ठिकाणी झाली. बालपणापासूनच समाजातील वास्तव, लोकांच्या समस्या आणि बदल घडवण्याची आस मला प्रेरणा देत राहिली. पुण्यात शिक्षण घेत असताना समाजकार्याची जाणीव अधिक दृढ झाली.

डॉ. बाबासाहेब आंबेडकर यांच्या विचारांनी प्रेरित होऊन मी वैद्यकीय शिक्षणाची वाट निवडली. समाजातील सर्व स्तरांतील लोकांना आरोग्यसेवा उपलब्ध करून देण्याची धडपड गेली तीन दशकं अखंडपणे चालू आहे. हे कार्य केवळ डॉक्टर म्हणूनच नाही तर एक संवेदनशील नागरिक म्हणून करण्याचा माझा प्रयत्न आहे.

पण एवढ्यावर थांबणं मला योग्य वाटलं नाही. कारण आरोग्यसेवेसोबतच समाजातील इतर प्रश्न — शिक्षण, स्वच्छता, पायाभूत सुविधा, सामाजिक न्याय — यांचं निराकरण व्हावं हीदेखील माझी जबाबदारी होती. म्हणूनच राजकारणात सक्रिय होण्याचा निर्णय घेतला.

आपल्या विश्वासामुळे मला सलग तीन वेळा प्रतिनिधित्व करण्याची संधी मिळाली. या काळात आपल्या भागातील समस्या सोडवण्याचा, नवीन योजना राबवण्याचा आणि नागरिकांच्या दैनंदिन जीवनात सकारात्मक बदल घडवण्याचा मी प्रामाणिक प्रयत्न केला आहे.

आज मागे वळून पाहिलं, तर गेल्या ३० वर्षांत मिळालेला अनुभव, घडवलेली कामगिरी आणि तुमचं अपार प्रेम हेच माझं खऱ्या अर्थाने भांडवल आहे. येणाऱ्या काळातही हा प्रवास तुमच्या विश्वासाच्या बळावर अधिक जोमाने सुरू राहील, याची मला खात्री आहे.